Blogger Tips and TricksLatest Tips And TricksBlogger Tricks

Sunday, January 1, 2012

ആനയും കുരങ്ങനും പിന്നെ വവ്വാലും ഇവരിൽ ആരാണ് മുൻപൻ?

എന്റെ മക്കൾക്ക് നല്ല ഒരു വർഷം ആശംസിക്കുന്നു.... 
ഒരിക്കൽ ഒരു പടുകൂറ്റൻ ആലിന്റെ തണലിൽ ഒരു വാവലും(വവ്വാലും), ആനയും കുരങ്ങനും താമസിച്ചിരുന്നു.  അവർക്ക് അന്യോന്യം ഒരു യോജിപ്പും ഇല്ലായിരുന്നു.  ആന പറയുന്നത് കുരങ്ങനും വാവലിനും ഇഷ്ടപ്പെടുകയില്ല; കുരങ്ങിനെ ആനയും വാവലും കൂടി കുറ്റപ്പെടുത്തും; വാവലിനെ തരം കിട്ടിയാൽ ആനയും കുരങ്ങും ഉപദ്രവിക്കും.  പരസ്പരം സ്നേഹമില്ലാതെ എങ്ങിനെയാണ് ഒരുമിച്ചു കഴിയുക? അതുകൊണ്ട് അവരിൽ ഏറ്റവും പ്രായം കൂടിയ ആൾ പറയുന്നതനുസരിച്ച് കഴിയേണം എന്നവർ തീരുമാനിച്ചു. 
        ആരാണ് ഏറ്റവും പ്രായം കൂടിയവൻ? അവർ ഓരോരുത്തരും, തനിക്കാണ് ഏറ്റവും പ്രായം കൂടിയതെന്ന് വാദിച്ചു.  വീണ്ടും വഴക്ക് തുടങ്ങി.  ഒരു ദിവസം വൈകിട്ട് അവർ മൂവരും കൂടി ആൽച്ചുവട്ടിൽ ഇരിക്കുകയായിരുന്നു.  വാവലും കുരങ്ങനും കൂടി ആനയോടു ചോദിച്ചു, “ആനച്ചങ്ങാതിയുടെ ചെറുപ്പത്തിൽ ഈ ആലിന് എന്തു വലിപ്പമുണ്ടായിരുന്നു?”
        “ഓ, അതോ,    ഞാനൊരു കുട്ടിയായിരുന്നപ്പോൾ ഈ ആൽ വെറുമൊരു ചെടിയായിരുന്നു.  ഒന്നോ രണ്ടോ ഇല, അതിൽ കൂടുതൽ ഇല്ലായിരുന്നു. ഇതിനരികിലൂടെ ഞാൻ അങ്ങോട്ടുമിങ്ങോട്ടും നടന്നിട്ടുണ്ട്. കൂടിയാൽ എന്റെ മുട്ടിന്റെ ഒപ്പം ഉയരം വരും”, ആന പറഞ്ഞു. 

        ആനയോടു ചോദിച്ച ചോദ്യം തന്നെ ആനയും വാവലും കുടി കുരങ്ങണൊടു ചോദിച്ചു.  അപ്പോൾ കുരങ്ങച്ചൻ ഇങ്ങനെ പറഞ്ഞു. “ ഞാൻ പിച്ചവച്ചു നടന്ന കാലം മുതൽ ഈ ആലിനെ അറിയും.  ഇത് മുളച്ചു വരുന്നതേ ഉണ്ടായിരുന്നുള്ളൂ.  അന്നിതിന്റെ പരുപ്പടർത്തിയെടുത്ത് ഞാൻ തിന്നതും ഓർക്കുന്നു. എന്നിട്ടും ഇവൻ ഇത്രേം വളർന്നു പോയല്ലോ.”
        ആനയും  കുരങ്ങനും കൂടി വാവലിനോടും ഈ ചോദ്യം ചോദിച്ചു. വാവൽ തൊണ്ടയൊന്ന് കാറി ശബ്ദമുണ്ടാക്കിക്കൊണ്ട് പറഞ്ഞു, “കൂട്ടുകാരേ, ഇവിടെയീ വലിയ ആൽ നിൽക്കുന്ന സ്ഥാനത്ത് പണ്ട് ഇതിലും വലിയ ഒരു ആൽമരം ഉണ്ടായിരുന്നു.  ഒരു ദിവസം ഞാൻ അതിന്റെ കുറെ പഴങ്ങൾ തിന്നിട്ട് അതിന്റെ ഒരു കൊമ്പിൽ കിടക്കുകയായിരുന്നു.  അപ്പോൾ അതാ ആ കാണുന്ന കൊടുമുടിയുടെ മുകളിൽ നിന്നും ഒരു വലിയ മഞ്ഞുമല അടർന്നു വീണു.  എങ്ങനെയോ തക്ക സമയത്ത് ഞാൻ ഉണർന്നു.  പെട്ടെന്ന് പറന്നുയർന്നു രക്ഷപ്പെട്ടു.  തിരികെ വന്നു നോക്കുമ്പോൾ അവിടെ ആൽമരം കാണാൻ കഴിഞ്ഞില്ല. അത് പിഴുതൊലിച്ചു പോയിരുന്നു.  ഞാനവിടെ കടിച്ചു തുപ്പിയ വിത്ത് മുളച്ചാണ് ഈ ആൽ ഉണ്ടായത്. അങ്ങനെ ഈ ആലിന്റെ അമ്മ ആലിന്റെ കാലം മുതൽ ഞാൻ ഇവിടെ ഉണ്ട്.”
        വാവൽ പറഞ്ഞ കഥ കേട്ട് ആനയും കുരങ്ങും അതിശയിച്ചു.  അവർ വാവലിനെ തങ്ങളുടെ നേതാവായി തെരഞ്ഞെടുത്തു.  അന്നുമുതൽ പ്രായത്തിൽ മുതിർന്നവനായ വാവൽ പറയുന്നതനുസരിച്ച് ആനയും കുരങ്ങും ജീവിച്ചു.  അവരുടെ ഇടയിൽ മൈത്രിയും സാഹോദര്യവും അച്ചടക്കവും ഉണ്ടായി. 
        ഈ കഥയിൽ നിന്ന് എന്റെ കുഞ്ഞുങ്ങൾക്ക് എന്തൊക്കെ മനസ്സിലായി.  പ്രായത്തെ ബഹുമാനിക്കുകയും പ്രായമായവരുടെ അറിവിനെ അംഗീകരിക്കുകയും ചെയ്താൽ നമുക്ക് സമാധാനവും നന്മയും ഒക്കെ ഉണ്ടാവുമെന്നാണ് ഈ കഥയിൽ കൂടി നാം മനസ്സിലാക്കേണ്ടത്.  കഥ എന്റെ കുഞ്ഞുങ്ങൾക്ക് ഇഷ്ടമായോ?
             ഇനി, നമുക്ക് മഹത്തായ ആൽമരത്തെക്കുറിച്ച് കൂടുതൽ അറിയാൻ ദേ ഇവിടെയും, കുരങ്ങനെക്കുറിച്ചറിയാൻ ഇവിടെയും, ആനയെക്കുറിച്ചറിയാൻ ഇവിടെയും, വവ്വാലിനെക്കുറിച്ചറിയാൻ ഇവിടെയും ക്ലിക്ക് ചെയ്യണേ...

12 comments:

  1. പ്രായത്തെ ബഹുമാനിക്കുകയും പ്രായമായവരുടെ അറിവിനെ അംഗീകരിക്കുകയും ചെയ്താൽ നമുക്ക് സമാധാനവും നന്മയും ഒക്കെ ഉണ്ടാവും. എല്ലാ കുഞ്ഞുങ്ങൾക്കും പുതുവത്സരാശംസകൾ....

    ReplyDelete
  2. ഈ കഥ മുൻപ് കേട്ടിട്ടില്ല
    നന്ദി
    ഒരു കുഞ്ഞ് :)

    ReplyDelete
  3. പുതുവത്സരാശംസകള്‍

    ReplyDelete
  4. കുഞ്ഞുമോള്‍ക്കും പറഞ്ഞു കൊടുക്കാം ഈ കഥ .അഭിനന്ദനങ്ങള്‍

    ReplyDelete
  5. തീർച്ചയായും ഇപ്പോഴത്തെ കുട്ടികൾക്ക് പറഞ്ഞുകൊടുക്കേണ്ട കഥ. പ്രായത്തെ ബഹുമാനിക്കാതിരിക്കുകയും പ്രായമായവരെ കളിയാക്കുകയും ഒക്കെ ചെയ്യുന്ന ഒരു കാലഘട്ടമാണല്ലോ ഇത്. കുരുന്നു മനസ്സുകളിൽ ഈ ആശയം ഉറയ്ക്കട്ടേ. നവവത്സരാശംസൾ.

    ReplyDelete
  6. എന്റെ കുട്ടികൾക്ക് പറഞ്ഞുകൊടുക്കാം ഈ കഥ :)
    അഭിനന്ദനങ്ങള്‍

    ReplyDelete
  7. കഥ ഇഷ്ട്ടായേ...!
    ദ് ആദ്യായിട്ടാ കേള്‍ക്കണത്.
    പറഞ്ഞു തന്നേനു നന്ദി.

    പുതുവത്സരാശംസകളോടെ....പുലരി

    ReplyDelete
  8. മകന് പറഞ്ഞു കൊടുക്കാന്‍ പറ്റിയ കഥ ,നന്ദി

    ReplyDelete
  9. ഞാനും വന്നു. ഇക്കഥ വായിക്കാന്‍. എനിയ്ക്കും ഒരു ചക്കരമുത്തുണ്ട്. വല്ലപ്പോഴും അവിടെ വന്നൊരു മുത്തം ഇടുക

    ReplyDelete
  10. കഥ ഇഷ്ടപ്പെട്ടു. ഉപകാരപ്രദം.. ആശംസകള്‍.

    ReplyDelete
  11. നേരത്തെ കുറുക്കന്റേയും മുതലയുടേയും കഥ മാത്രമങ്ങ് വായിച്ചേച്ച് പോകാൻ കഴിഞ്ഞില്ല. അതാ വീണ്ടും വന്നത്. ഞാൻ പറഞ്ഞ് കേട്ടിട്ടില്ലാത്ത കഥകൾ, ഇതിനായി ഇനിയും വരും. ആശംസകൾ.

    ReplyDelete
  12. മനോഹരമായ ഒരു സാരോപദേശ കഥ. ഇത്തരം കഥകള്‍ കുട്ടികള്‍ക്ക് വളരെയേറെ പ്രയോജനപ്പെടും. കഥ പറയാന്‍ നമുക്ക് നേരം ഇല്ലാതെ പോകുന്നത് കൊണ്ടും, അത് കേള്‍ക്കാന്‍ കുട്ടികള്‍ക്ക് താല്‍പ്പര്യം ഇല്ലാത്തതുകൊണ്ടും ആണ് പുതിയ തലമുറകള്‍ അര്‍ത്ഥമില്ലാത്തവരായി വളരുന്നത് . നിങ്ങളുടെ ഉദ്യമത്തെ ഞാന്‍ അകമഴിഞ്ഞ് അഭിനന്ദിക്കുന്നു .

    ReplyDelete